Sa aming mga mahal na Ka-Forex:

Para sa inyong dagdang kaalaman, ang Bureau of Customs ("BOC") ay naglabas ng bagong Memorandum kung saan isinasaad na hindi na itutuloy ang dating plano na ilagay ang mga balikbayan boxes upang isa-isang isailalim sa X-ray examination. Napagdesisyonan ito ng BOC sapagkat ang nasabing pamararaan ng X-ray examination ay mahirap maisakatuparan dahil sa maraming operational at praktikal na limitasyon sa bahagi ng BOC.

Sa halip, ang X-ray examination ay isasagawa sa buong container na lamang, kasama na ang pagbubukas ng container at ang pagsasailalim ng mga balikbayan boxes sa mga trained dog sniffers.

Kung magpositibo ang kahon sa amoy ng aso, ang masusing examination ay isasagawa sa Designated Examination Area (DEA) ng BOC. Ngunit kung mag-negatibo ang resulta ng K-9 inspection, ang examination ay isasagawa sa warehouse ng deconsolidator kung saan lahat ng kahon ay bubuksan at susuriin.

Ang mga nasabing pamamaraan ng inspeksyon ay magdudulot pa rin ng karagdagang panahon sa processing ng mga balikbayan boxes, ngunit ito ay hindi magiging mas mahaba at malala kung ikukumpara natin sa magiging epekto sana ng naunang planong X-ray examination ng mga balikbayan boxes sa paleta na sadyang may katagalan upang maisagawa ito.

Mananatili ang Forex Cargo UK sa tapat na pagbabantay at pagsisiguro na ang lahat ng eksaminasyon na gagawin sa mga balikbayan boxes ninyo ay naaayon sa batas at mga regulasyon ng BOC.